Binilin ni Presidente Ferdinand R. Marcos Jr. ti Department of Public Works and Highways (DPWH) a dagus a risuten ti kinakurang dagiti klasrum iti intero a pagilian, kalpasan a 22 classrooms pay laeng ti naipatakder ti nasao nga ahensia ita a tawen.
Segun ken ni Palace Press Officer Claire Castro, madaman nga im-imbestigaran ti presidente ti pannakaitantan dagiti proyekto, idinto a binilinna ni DPWH Secretary Vince Dizon a mangisayangkat ti catch-up plan tapno mapapardas ti panangipasdek kadagiti pagadalan.
Mapapati a karaman kadagiti addang ti administrasion ti pannakibinnulig kadagiti local government unit (LGU) tapno mapapardas ti construction process.
Impasigurado pay ti Malacañang a no mapaneknekan nga adda pagkurangan wenno adda panangbaybay-a dagiti opisial ket adda nasken a sumungbat, gapu ta agtaltalinaed a prayoridad ti administrasion ti panangtaming iti kinakurang dagiti klasrum iti pagilian. Augie Arellano
