Pinainget ti Philippine National Police (PNP) ti seguridad iti 108 a lugar idiay Bangsamoro Autonomous Region in Muslim Mindanao (BARMM) a maibilang nga areas of concern sakbay iti eleksion iti rehion.
Imbilin ni PNP Chief Gen. Jose Melencio Nartatez Jr. ti nayon a security measures kalpasan a bigbigen ti Commission on Elections (Comelec) dagiti lugar nga adda agduduma a lebel iti security risk.
Karaman dayta ti Lanao del Sur nga adda kaadduan a red zone-na nga umabot iti duapulo ket maysa idinto nga adda sangapulo ket maysa nga orange zone idiay Maguindanao del Sur.
Naipatungpal payen ti gun ban iti intero nga BARMM ken umabot iti 9,463 a polis iti nakadeploy para iti seguridad iti eleksion.
Papigsaen pay ti PNP ti intelligence-sharing ken koordinasionda iti Armed Forces of the Philippines tapno maliklikan dagiti pangta manipod kadagiti armado a grupo.
