Pinainget ti Philippine National Police ti monitoring iti posible nga overpricing, hoarding, ken profiteering kadagiti produkto nga agricultural kalpasan ti epekto dagiti bagyo ken habagat.
Segun ken ni PNP chief Gen. Jose Melencio Nartatez Jr., nainget a maipatpatungpal ti zero-tolerance policy kontra kadagiti negosiante a manggungundaway iti sitwasion tapno maipangina ti presio dagiti kangrunaan a magatang.
Makikbinnulig dagiti lokal a police unit kadagiti maseknan nga ahensia ti gobierno tapno maimbestigaran dagiti reklamo.
Kabayatanna, umaboten iti P347.37 million ti nadadael ken pannakalugi iti sektor ti agrikultura, a nangapektar kadagiti 12,151 a mannalon, 10,662 nga ektarya ti daga a pagtalonan, ken 9,491 a metriko tonelada a produksion.
Inallukoy met ni Nartatez dagiti trader ken seller a pagtalinaedenda ti nainkalintegan ken patas a presio kabayatan a bumangbangon pay laeng ti komunidad manipud iti epekto ti didigra.
