Imbayogen ti Philippine National Police iti heightened alert status ti amin a unit-na kalpasan dagiti naireport a panaglayus kadagiti sumagmamano a lugar iti Luzon ken Mindanao kasaruno ti mano aldaw nga awan sardayna a panagtudo.
Segun ken ni PNP Chief General Jose Melencio Nartatez Jr., imbilinnan kadagiti amin a regional ken local police unit a dagus nga i-activate dagiti disaster response team ken dagiti kasapulan nga alikamen tapno tumulong kadagiti apektado a komunidad ken masigurado ti kinatalged ti publiko.
Maipalagip a nalayus dagiti dadduma a paset ti Quezon kadagiti naglabas nga aldaw gapu iti masansan a tudo, kimat, ken garruod uray no inlawlawag ti PAGASA a saan pay laeng nga opisial a nangrugi ti panagtutudo iti pagilian.
Nainget ti pannakibinnulig ti PNP kadagiti opisial ti barangay ken local government unit, nangruna iti panangkita kadagiti high-risk area a mabalin nga agkasapulan iti pre-emptive evacuation wenno nasapa a panagbakwit.
