Pinainget ti Philippine National Police ti seguridad iti intero a pagilian iti salinong ti programa a ‘Ligtas Paskuhan 2025’ tapno masigurado ti natalged ken nakappia a paskua.
Umabot iti 70,000 a pulis, nasurok 6,000 nga auxiliary unit, ken nasurok 24,000 nga asset ti maideploy kadgaiti simbaan, kangrunaan a kalsada, terminal, mall, pagpasiaran, ken kadagiti naituding a fireworks zone, nangruna inton December 24 ken 31.
Segun ken ni Acting PNP Chief Police Lt. Gen. Jose Melencio Nartatez Jr., ti dakkel a deployment ket gagemna a masigurado a natalged ti publiko ken alisto a marespondean ti ania man a pasamak.
Mangnayon pay ti PNP iti K9 units kadagiti pantalan, dagiti Explosive Ordnance Disposal teams para kadagiti pampubliko a lugar, ken dagiti medical unit para iti posible a firecracker-related injuries.
Mabantayan pay dagiti holiday scam, a manamnama nga agraira ita a holiday season.
Nagpalagip ti kapulisan mainaig kadagiti maiparit a klase ti palpalibang ta mabalin a mangitunda daytoy iti disgrasya.
