Inallukoy ti Philippine National Police ti publiko nga itawag iti unified hotline a 911 dagiti panagabuso a makita wenno mapadasanda iti baet ti pannakaipatungpal ti safer cities initiatives.
Kasaruno daytoy ti panangipagarup ti Samahan ng Progresibong Kabataan wenno SPARK nga anti-poor ken amangan a maaramat iti harassment ti napabileg nga anti-criminality operations.
Segun ken ni PNP Spokesperson PBGen. Randulf Tuaño, dayawen ti PNP ti panagdillaw dagiti umili ngem saanen a baro ti nasao nga inisiatiba.
Gagemna laeng daytoy a mapabileg dagiti maipatpatungpal nga ordinansa kas ti pannakaiparit ti panaginom iti arak kadagiti pampubliko a lugar, pannagna a nakaussob, curfew kadagiti menor de edad ken panag-videoke iti nalablabes ngem ti naituding nga oras.
Impasigurado ti opisial a saan laeng nga iti damo ti nasao a tignay ti kapulisan no di ket mapagtalinaed ken agbalin a paset ti duty ti PNP kadua dagiti opisial ti barangay.
