Impasigurado ti Philippine National Police nga awan ti pakadanagan iti panagadu ti police personnel ken checkpoints iti Bangsamoro Autonomous Region in Muslim Mindanao wenno BARMM kas paset ti panagsagana iti Parliamentary elections inton Setyembre 14.
Segun ken ni PNP Chief Gen. Jose Melencio Nartatez Jr., gagem ti napainget a seguridad tapno maprotektaran dagiti botante, election personnel ken dagiti polling area, ken maliklikan ti posible a kinaranggas ken dadduma pay a pangta.
Iti kaudian a deployment, 9, 821 a pulis ti naideploy iti rehiyon pakairamanan ti 856 checkpoints.
Pinasingkedan ni Nartatez a manamnama a manayonan pay ti checkpoints kadagiti sumarsaruno nga aldaw bayat nga umadani ti election.
Nakibinnulig metten ti PNP iti Armed Forces of the Philippines, Commission on Elections ken Local Government Units tapno mapagtalinaed ti natalged ken naurnos nga eleksion.
