Kinumpirmaran ti abogado ti pamilia ni Geneva Lopez a naicrematen idi kalman ti bangkay ti Kapampangan beauty queen a nasarakan a natay iti nasulinek a lugar idiay Capas, Tarlac.
June 21 idi maipadamag a mapukpukaw ti beauty queen kadua ti Israeli fiancé na a ni Yitzhak Cohen.
Agdama met nga adda iti ili ti Lopez, Pampanga ti lamay ti beauty queen.
Kabayatanna, pinasingkedan ti National Bureau of Investigation a napaltugan iti namindua a daras ti beauty pageant contestant ken ti Israeli a nobiona basar iti pannakaidalan ti bangkayda iti autopsy.
Ti beauty pageant contestant ket adda tama ti paltog iti bukot ken luppona idinto a ti nobiona ket iti barukong ken asideg ti kilikilina.
Nasarakan pay ti buli iti bagi ni Lopez a maipasanto para iti ballistics examination.
Mayur-uray pay met iti agdama ti resulta ti DNA test dagiti biktima.
Kabayatanna, adda iggem a dua a suspek ti PNP-CIDG ken basar iti inisyal nga imbestigasyon, posible a riri iti daga ti motibo iti krimen isu nga inton bigat ket naituding ti pannakaipila ti kaso.
