Pinasingkedan ti Philippine National Police nga awan ti naawatda nga impormasyon iti “credible threat” kontra kenni Vice President Sara Duterte.
Idi napan a lawas, kinuna ti bise presidente a saan nga ikaskaso ti gobierno ti pangta ti biagna.
Segun kenni PNP spokesperson Brig. Gen. Jean Fajardo, uray no awan iti naawatda nga impormasyon maipapan ti nasao a banag, saanda a mabalin nga agpakampante kangrunaan ket biag ti bise presidente iti mapagpapatangan.
Maipalagip nga idi napan a lawas, dagiti miembro ti Vice Presidential Security and Protection Group (VPSPG) ket temporario a masukatan iti baro a personnel manipud Armed Forces of the Philippines (AFP) ken PNP.
Kinuna met ni AFP chief General Romeo Brawner Jr. a nakaawatda ti subpoena manipud PNP nga agpanpanawagan a maimbestigaran dagiti kameng ti Vice Presidential Security and Protection Group.
