Adda maibilangen a ‘persons of interest’ ti Philippine National Police (PNP) iti pannakapapatay ti atleta ken air force man a ni Mervin Guarte.
Iti impormasyon ni Calapan City Police Chief Lt. Col. Roden Fulache iti Kampo Krame, kinunana nga adda dagiti nakainuman ti biktima iti rabii sakbay a nabagsol idiay Calapan city, Oriental Mindoro iti alas 4:30 iti bigat.
Segun kenni Col. Fulache a taga-Batangas ti biktima ken napan laeng iti nasao a lugar gapu iti gayyemna a konsehal.
Matmaturog laeng ni Guarte iti balay ti gayyemna idi simrek ti maysa a lalaki ket binagsolna ti barukongna.
Nakabaelan pay laeng ni Guarte ti immawag iti tulong ken naipan iti ospital ngem dead on arrival.
Ni Guarte ket kameng ti Philippine Air Force (PAF) ken nakadestino iti Fernando Airbase, Lipa Batangas.
Malaksid pay dayta, nag-champion pay ni Guarte ti 2024 Spartan Asia Pacific; SEA Games Gold medalist ken SEA Games Silver medalist national record holder.
