Natalged ti kasasaad dagiti Pilipino idiay Lebanon iti baet ti advisory ti Philippine Embassy a panawandan iti nasao a pagilian kagiddan ti mapapasaran ti tensyon.
Iti pannaki-uman ti Bombo Radyo Vigan ken ni Bombo International News Correspondent Rowena Bagoyo manipod Lebanon, adayoda kadagiti gulo a mapapasamak ta kangrunaan nga apektado iti bagatan a paset iti Lebanon.
Segun ken ni Bagoyo, nu maipanggep ti trabahona ket saan nga apektado ta ibagbaga dagiti amona iti sitwasyon ket awan ti parikot iti agdama.
Saan leng a nakabasar dagiti amona iti pagsapulanda idiay Lebanon ta adda pay negosyoda iti ruar iti pagilianda nga isu ti pagal-alaanda ti sapul para ti pamiliada ken uray kadakuada nga OFW.
Pinunas met ni Karen Bou Ramia Bassil, British nga amo ni Bagoyo ti buteng dagiti Pilipino nga adda idiay Lebanon ta siguradoenna a natalgedda ken agbibiagda a normal ket awan ti buteng a mariknada inaig iti mapapasamak iti agdama.
Segun ken ni Bassil, agop-operate latta iti amin nga airport, petrol ken supermarket iti lugarda isu nga awan ti rumbeng a pagdanagan para kadagiti Pilipino nga agtrabtrabaho iti nasao a pagilian.
Kabayatanna, nu bilang ibilin iti gobierno iti Pilipinas a pagawiden dagiti OFW ket awan ti maaramidanna ta masapul a sumurotda kadagiti maiyetnag.
