Binalakadan ti Philippine Embassy idiay Kuwait dagiti Pilipino iti nasao a pagilian nga agtultuloy nga agannad ken agalerto iti baet ti agtultuloy a tensyon idiay Middle East.
Inallukoy ti embahada dagiti Pilipino a suroten iti bilin dagiti otoridad iti Kuwait ken mangala laeng iti impormasyon manipod iti opisyal a sources iti damag ken social media.
Nabalakadanda pay a liklikan pay laeng iti saan a kasapulan a panagbiahe ken limitaran dagiti aktibidad iti ruar babaen iti napapateg a lakad.
Kiniddaw pay ti embahada kadagiti Pilipino nga agtalinaed a silulukat dagiti mobile phone ken gadget-da tapno nakasagana latta iti pannakikammayetda iti aniaman nga oras.
Nagballaag pay ti ahensia kontra iti panagiwaras ti fake news, madi nga impormasyon ken espekulasyon maipanggep iti sitwasyon iti rehiyon.
