Pinaglibakan ni Cagayan de Oro 1st District Rep. Lordan Suan ti statement a naiwaras iti social media a nangipangta a mangiduron iti House hearing ken “shoot-to-kill” resolution kontra ken ni Sen. Ronald “Bato” dela Rosa.
Segun ken ni Suan, peke ken pinarparbo ti nasao a statement ken impapilitna a saanna pulos inaramid iti dayta.
Immunan a pinuntiria ti kongresista ti saan nga umiso nga impormasion iti online, pakairamanan dagiti peke a statement a mangibagbaga a saan a maawat ni Bise Presidente Sara Duterte iti distritona.
Aglemlemmeng ni Dela Rosa manipud pay idi Mayo mainaig iti kaso a crimes against humanity of murder a sangsanguenna iti International Criminal Court (ICC), idinto a nagleppas ti maysa a lawas a deadline ti panagsukona idi Oktubre 30.
