VIGAN CITY – Nagpanawagan ni Magsasaka Partylist Rep. Argel Cabatbat kadagiti kakaduana iti kongreso para iti pannakaipaay ti naan-anay a pondo a mailatang iti Department of Agriculture.
Segun ken ni Cabatbat, innem a pulo ket innem a bilion a pisos ti inaprubaran ti Department of Budget and Management a pondo para iti Department of Agriculture ket kiddawenda a maited ti uppat a pulo ket dua a bilion a pisos a balanse pay ti gobierno ta naiteddan ti duapulo ket uppat a bilion a pisos a paset kadagiti inkari ni Presidente Rodrigo Duterte nga agpaay iti sektor ti agrikultura.
Babaen ti naan-anay a pondo a mailatang iti nasao nga ahensia ket nasigsigurado ti food security ti pagilian ken maliklikan ti panagangkat kadagiti sabali a pagilian.
Pinalagipan ti kongresista dagiti mannalon a saanda nga agdudua a mapan agpatulong kadagiti maseknan nga ahensia ta nakasaganada latta nga agserbi ti grupo kas boses dagiti mannalon iti gobierno.
