VIGAN CITY – Sangagasut innem a pulo a ribo a pisos ken cellphone nga aggatad iti sangapulo ket innem a ribo a pisos ti mapapati a tinakaw dagiti saan pay a nabigbig a suspek idiay Brgy. Bio,Tagudin.
Ti biktima ket ni Marialuz Cardenas, agtawen iti tallopulo ket tallo nga agnaed iti nasao a lugar.
Iti pannaki-uman ti Bombo Radyo Vigan ken ni P/Capt. Jose Bandong II, Officer-in-charge ti Tagudin Municipal Police Station, nasarakan ti ikit ni Cardenas a ni Febe Navarro ken ti anakna a menor de edad ti biktima nga awan puotna a nakapakleb ken naigalut ti dua a sakana.
Nakapuot ti biktima idi inikkat dagiti pannakabagi ti linteg ti barut a nakaiputipot iti sakana ket naduktalanna a mapukpukawen ti kuartana ken bag a naglaon iti driver’s license ken UMID ID a nakadulin iti cabinet ket pinasingkedanna nga idi makariing iti parbangon ket adda nangpugsit kenkuana a nakaulawanna.
Nupay kasta, adda fingerprint dagiti suspek kadagiti iniggananda nga alikamen nga isu ti pamalpalatpatan dagiti pannakabagi ti linteg.
