Impasigurado ti Philippine National Police (PNP) nga itedda ti PHP14 milion a pisos a gunggona iti “tipster” a positibo a nangitudo iti ayan ni Pastor Apollo Quiboloy ken dagiti uppat a kaduana nga akusado.
Dayta ket kalpasan nga inyanunsiyo ti PNP a ti “tipster” ti nagserbi a wagas tapno malpasen ti dua a lawas nga operasyon ti Pulisya iti Kingdom of Jesus Christ compound idiay Davao City.
Segun kenni PNP Public Information Office Chief, PCol. Jean Fajardo, rimmuar ti “tipster” idi Biernes, Setiembre 6, 2024, ken nangitudo iti eksakto a lokasion ti Quiboloy.
Gapu iti daytoy, mangangay ti meeting da Interior Secretary Benhur Abalos Jr., PNP Chief Police Gen. Rommel Francisco Marbil, ken Davao Regional Police Director, Police Brig. Gen. Nicolas Torre III tapno pagsasaritaan ti panangted ti reward.
