VIGAN CITY – Makaawat iti sangapulo agingga sangapulo ket lima a ribo a pisos nga aggapu iti Department of Agriculture dagiti mannalon ken mangngalap a naapektaran kadagiti naglabas a bagyo.
Iti pannaki-uman ti Bombo Radyo Vigan ken ni Agriculture Sec. William Dar, dua gasut innem a pulo a ribo a mannalon ti naapektaran kadagiti naglabas a bagyo iti pagilian ket kasapulan a dagiti umawat ket nakarehistro iti Philippine Crop Insurance Corporation ta adda ti maysa a bilion a pisos a nakalatang iti imdemnification funding.
Mabalinda pay a makautang iti duapulo ket lima a pisos babaen iti SURE AID program ti ahensia a mabalinda a bayadan iti las-ud ti sangapulo a tawen nga awan iti interesna.
Malaksid ti dayta, nakagatangdan kadagiti ipaayda a nadumaduma a klase ti bukel, fingerlings ken native chicks tapno makarugi manen iti baro a pagsapulan dagiti mannalon.
