Natalek ti Philippine Energy Research and Policy Institute (PERPI) iti policy direction ti Marcos administration para iti nadalus nga enerhia wenno clean energy.
Segun ken ni PERPI Executive Board Member Atty. Jay Layug, dakkel ti potensyal iti Pilipinas a magun-od dagiti gagemda iti nadalus nga enerhia kangrunaan ket adu dagiti gangannaet nga agpuonan iti energy sector.
In-inut pay a magungun-od ti modernisasyon iti power sector iti Pilipinas babaen ti moderno a pasilidad, grid equipment ken dadduma pay.
Segun ken ni Atty. Layug, mapatta-patta a 90% a gangannaed nga agpuonan iti sektor iti enerhia ti makakitkita ita ti potensyal ken mayannaatup nga energy policy iti Pilipinas.
In-example ti opisyal ti pannakipaset ti Pilipinas iti Green Energy Auction Program (GEAP) iti DOE, a mangidiaya ti natibker a 20-year payment mechanism iti nalaklaka a gatad wenno rates.
Babaen dayta ket natalek ti opisyal a kabaelan a magun-od ti target iti Marcos administration a 40% renewable energy share apaman a dumanon iti 2030, tapno makaibati iti nadaldalus nga energy sector kadagiti sumarsaruno nga administrasyon.
