Inawagan ni Sen. Joel Villanueva ti Department of Health (DOH) ken PhilHealth a simpaen ken palawaenda ti autism spectrum disorder (ASD) benefit package tapno ad-adu pay a pamilia ti makaawat iti tulong.
Segun ken ni Villanueva, 482 laeng a pamilia ti nakaganar iti nasao a benepisio manipud nairugi idi 2017 gapu ta lima laeng a pasilidad iti intero a pagilian ti akreditado para kadagiti serbisio a saklawen daytoy.
Binalawna pay ti nababa nga assessment fee a P3,000 agingga iti P5,000 ken ti limitasion ti 90 a therapy sessions no idilig iti aktual a gastos dagiti pamilia nga addaan iti ASD.
Plano ti PhilHealth a paaduen ti gatad ti benepisio ken bilang dagiti konsultasion, palawaen ti akreditasion dagiti therapist, ken sanayen dagiti health workers para iti nasapsapa a pannakailasin ken pannakaiturong dagiti ubbing nga addaan iti ASD.
