Nangisayangkat ti Embassy of the Philippines in Israel ti online coordination meeting kadua ni Hans Leo Cacdac a secretary iti Department of Migrant Workers (DMW) ken dagiti Filipino community leader ken coordinator manipod iti agduduma a paset iti Israel.
Nangted ni Aileen Mendiola ti update maipanggep iti agdama a sitwasyon idiay Israel pakairamanan dagiti tulong nga inted iti embahada kadagiti Pilipino nga apektado iti tensyon idiay Middle East, karamanen ti napapateg a safety advisories.
Imbingay ni Sec. Cacdac a nakasagana iti DMW a mangirusat ti repatriation operations no kasapulan para kadagiti Pilipino a kayatna iti agawid iti Pilipinas.
Segun ti embahada, napateg dagiti nasao a coordination meeting tapno mapapigsa ti kammayet iti gobierno ken Filipino community para iti kinatalged ken pagsayaatan dagiti Pilipino idiay Israel.
