Binilin ni Presidente Ferdinand Marcos Jr. ti Department of Health a siguradwen a maipatungpal ti zero balance billing para kadagiti amin a pasyente a nayospital kadagiti government hospital manipud iti epekto ti napigsa a gingined idiay Mindanao.
Segun ken ni Marcos, saanna kayat nga agparikut pay dagiti biktima iti gingined kadagiti bayadanda nga agpaagas idinto a makapadpadasda iti krisis iti biagda.
Maipalagip a bimmisita ti presidente idiay General Santos City ken personal a kinitana ti kasasaad dagiti pasyente a naka-confine kadagiti pagagasan ti gobierno a nagingined.
Imbilin pay ti presidente ti whole-of-government approach iti panangtaming iti epekto ti gingined ket impaganetgetna a maipangruna ti salun-at, kinatalged ken rehabilitasion dagiti biktima.
Ti zero balance billing ket epektibo laeng kadagiti pampubliko nga ospital a patpatarayen ti gobierno ken saan a karaman kadagiti pribado nga ospital.
