VIGAN CITY – Im-imbestigaran dagiti kameng ti Sta. Cruz municipal police station iti panagtakawan idiay Brgy. Sidaoen a napasamak idiay Guangdong Steel Enterprises Corporation a kukua ni Vice Mayor Virgilio Valle nga agnaed idiay Brgy. Poblacion.
Nakaawat dagiti kameng ti Sta. Cruz PNP iti impormasyon inaig iti nasao a panagtakawan isu a napan da iti lugar ket nakita da a nakalukat iti main door iti construction office.
Nakigtot ni Orlando Javillonar, agtawen ti lima pulo ket pito, project coordinator iti pagtagilakuan ken agnaed idiay Brgy. Sagat, Sta. Cruz idi nakita na a nadadael iti door knob ken nakalukat iti arwangan iti opisina da ket nalukatan pay dagiti lamisaan iti opisina ken dagiti steel cabinet.
Saan pay laeng a naamuan nu anya dagiti naitaray nga alikamen ken nu adda natakaw a kwarta agsipud ta manarimaan pay laeng iti inventory ken imbestigasyon dagiti otoridad.
