Pormalen a nagtugaw ni Most Reverend David William Antonio kas baro ken maikawalo nga arsobispo ti Archdiocese ti Nueva Segovia idiay Minor Basilica ti Our Lady of the Assumption iti ili ti Sta. Maria, Ilocos Sur.
Ti installation ket indaulwan ni Most Reverend Charles Brown, Apostolic Nuncio to the Philippines, kadua dagiti sumagmamano a cardinal a pakairamanan da Cardinal Luis Antonio Tagle,, Pro-Prefect for the Section for First Evangelization and New Particular Churches of the Dicastery for Evangelization; Jose Cardinal Advincula, Archbishop of Manila; Orlando Cardinal Quevedo, ken Bishop Gilbert A. Garcera, president of the Catholic Bishops’ Conference of the Philippines (CBCP) ken metropolitan archbishop ti Lipa.
Adda tema ti selebrasyon a “Ut vitam habeant” (they may have life), wenno iti Ilocano ket “maaddaanda iti biag”.
Indanon met dagiti tallo a cardinal ti kablaaw ken suportada ken ni Antonio.
Iti nagbalin a mensahe ni Antonio, pinagyamananna dagiti padi ken dagiti Katoliko a dimmar-ay tapno imatangan ti seremonya.
Kinunana a dagiti pastoral priorities-na ket agpokus iti panangibiag iti sao ti Dios, ken panangpadur-as iti maysa a Simbaan a nalaing a dumngeg – nangruna kadagiti marigrigat, panangpapigsa iti apostolado ti pamilia, panangital-o kadagiti inisyatiba para iti nainkalintegan a kagimungan, panangtaripato iti aglawlaw, ken panangital-o iti binnulig kadagiti nadumaduma a pammati.
Maipalagip a ni Antonio ket dinutokan ni Pope Leo XIV kas arsobispo ti Nueva Segovia idi November 4, kasukat ni retired Archbishop Marlo Peralta.
