Binabalaw ni SAGIP Partylist Cong. Rodante Marcoleta ti addang ti House Committee on Good Government and Public Accountability a mayakar iti Women’s Correctional Facility kalpasan a na-cite in contempt iti uneg ti kamara ti Chief of Staff ni Vice President Sara Duterte a ni Atty. Zuleika Lopez.
Iti pannaki-uman ti Bombo Radyo Vigan ken ni Cong. Marcoleta, nakakaskasdaaw ti pannakayakar ni Lopez agsipud ta dagiti kastoy a desisyon ket adda naan-anay a proseso a masurot.
Balawen pay ti kongresista no naikkan ida iti pammalubos manipud iti majority leader agsipud ta saan laeng a ti chairman ti agdesdesisyon no di ket iti sibubukel a committee body.
Innayonna nga awan ti pagibasaran dagiti amin nga inaramid ti komite nga isuda ti akin-basul gapu iti panangipapilitda a maimbestigaran no ania ti nagbanagan ti confidential funds ti Office of the Vice President, numan pay adda met ti Commission on Audit nga akin-trabaho.
Malaksid dayta, kunana a nakakadkadlawen a panangpulpulitika amin dagitoy agsipud ta maymaysa laeng nga opisina ti matartarget numan pay nagadu nga ahensia ti gobierno ti nailatangan iti confidential funds.
