VIGAN CITY – Pakaladingitan ni Giovanni Mendoza iti ipupusay ti asawana a ni Perlita Guillermo Mendoza, agtawen ti tallo pulo ket siam, OFW nga agnaed idiay Brgy. Carcarabasa, Lidlidda a nairaman a natay iti napasamak a panagbettak idiay Beirut, Lebanon ta naigiddan pay iti umuna nga anibersaryo iti ipupusay ti maysa nga anakda.
Iti pannaki-uman ti Bombo Radyo Vigan ken ni Mendoza, saan nga insigida a namati di naipakammo kadakuada a nairaman a natay ti asawana ngem adda nangkumpirmar kenkuana a nagaburan iti panagbettak isu a naladingitan la unay iti naamuanna.
Segun ken ni Mendoza, saanna pay nga ammo iti aramidenda ta yururayda iti panagtawag ti Department of Foreign Affairs para iti proseso iti panagawid ti bangkay ti asawana.
Innayonna pay nga awan iti aniaman a senyales a nadlawna iti ipupusayna ta nakasaritana pay laeng sakbay iti panagbettak.
