VIGAN CITY – Im-imbestigaran pay laeng dagiti kameng ti San Juan Municipal Police Station iti pannakapapatay ni Federico Dela Cruz, naasawaan, agtawen uppat a pulo ket lima, mannalon nga agnaed idiay Barangay, Lapting, San Jaun ta napaltogan idi rabii ti Pebrero 11 idiay Barangay Caronoan, San Juan.
Segun kenni PCapt Benjamin Raquedan ti San Juan Municipal Police Station, impakammo ni Susan Sarmiento a kabsat ti biktima a nasarakan ni Federico iti taltalon a kanayon a pappapanan na.
Immun-una iti dayta, sinapul dagiti kameng ti pamilya na ti biktima ta saan a nakaawid iti pagtaenganda ngem nakita da laengen a nakadata iti tingnga iti kamaisan.
Kinuna ni Raquedan a kasla saan a napaltogan ta impagarupda pay a naatake laeng wenno nakagat iti uleg ta nakadata ngem idi binalikid da ket nakita iti tama ti 12 gauge shotgun iti bukot na.
