Pannakapaliiw ti Undas iti probinsia, ‘generally peaceful’

“Generally peaceful” ti pannakapaliiw ti Undas ita a tawen iti probinsia, kas pinasingkedan ni Police Provincial Director Police Colonel Darnell Dulnuan.

Dayta ket iti baet ti panagdudupudop dagiti tattao kadagiti kalsada, kamposanto ken kadagiti simbaan.

Iti pannaki-uman ti Bombo Radyo Vigan ken ni PCOL Dulnuan, ‘compliant’ wenno nakasurot met dagiti umili kadagiti nayetnag a pagannurotan kas koma iti saan a panagitugot kadagiti arak, paltog ken patadem nangruna iti panagturong kadagiti kamposanto.

Numan pay adda latta met dagiti dadduma a naglabsing ket nabagaanda met a nasayaat ken sinurotda ti naibilin kadakuada.

Innayon ni Dulnuan nga awan ti nakumkumpiskarda a maiparit a banag kabayatan iti panangpaliiw iti piesta natay.