VIGAN CITY – Inlawlawag ni Highway Patrol GroupP/Maj. Jordan Sambo nga adda sursurotenda a pagannurotan nga inyetnag ti national government kadagiti cargo truck a lumasat iti quarantine checkpoint ta no linabsingda ket mabalin nga isuda ti makasoan.
Dayta ket kalpasan a pinalubosanda a sumrek ti maysa a wing truck a naggapu idiay Bulacan nga adda ti duapulo ket innem a construction worker a nakalugan ken natiliw iti quarantine checkpoint idiay Badoc, Ilocos Norte uray no dimmalandan iti quarantine checkpoint idiay Tarlac ken Pangasinan.
Iti pannaki-uman ti Bombo Radyo Vigan ken ni Sambo, saanen a mainspeksion dagiti linaon ti nasao a trak agsipud ta nakailanad iti pagannurotan ti Inter Agency Task Force a mailaksidda iti inspeksion ta saan a rumbeng a mataktak iti biaheda ken maibilangda nga authorized person outside residence.
No pay kasta, nagpalagip ni Sambo a tatta naisakup iti modified general community quarantine ti probinsia ket lima laeng ti rumbeng a lumugan kadagiti cargo vehicle tapno saan a mataktak ti biaheda ken rumbeng nga adda itugotda a pakabigbigan kadakuada.
