Welcome development para iti BAYAN-Europe ti pannakakemmeg ni dati a Presidente Rodrigo Duterte gapu iti mapapati a ‘crimes against humanity’ idi nagtugaw kas presidente ti pagilian babaen iti panangiyulog ti International Criminal Court iti arrest warrant.
Kas sungbat iti pannakakemmeg ni Duterte, nangisayangkat dagiti Filipino organization iti protesta iti ICC idiay The Hague, Netherlands nga indaulwan ti nasao a grupo kaduada ti Gabriela, Migrante European ken Friends of the Filipino People in Struggle tapno ipanawagan ti pannakadusana.
Iti pannaki-uman ti Bombo Radyo Vigan ken ni Lean Jimenez, Coordinator ti grupo, ibilangda a dakkel daytoy nga addang kadagiti rinibo a biktima ti nadara a war on drugs ni Duterte kasta payen iti pamiliada a nabayagen a mangipampanawagan iti hustisia.
Kinondenar pay ti BAYAN Europe ti panangiyaleng-aleng ti dati a presidente iti human rights ken rule of law agraman dagiti biag a napukaw gapu iti naranggas a wagasna iti kampanyana kontra iligal a droga.
Mangnamnamada nga agbalin nga accountable wenno madusa ni Duterte ken dagiti kaalyadona a nainaig iti nadara a waron drugs gapu kadagiti krimen a naaramid.
Innayon ti grupo a saan a pulos a malibasan ti dati a presidente ti hustisia.
