Dua ti nadunor iti napasamak nga aksidente idiay along national highway sakupen ti Barangay Calao-an siudad ti Candon.
Ti nagmaneho ti traysikel nga awan ti naipakita na a driver’s license idi napasamak ti insidente ket agtawen ti uppat a pulo ket pito, naasawaan, ken residente ti Barangay Villarica, Candon; ka-lugan na ti agtawen ti innem a pulo ket maysa, naasawaan ken residente ti Barangay Calao-an, Candon.
Ti met nagmaneho ti Mitsubishi XForce ket agtawen ti pitopulo ket maysa, mannalon, ka-lugan na ti agtawen ti innem a pulo ket innem, naasawaan ken residente ti Barangay Baracbac, Tagudin.
Iti pannakiuman ti Bombo Radyo Vigan ken ni PLT. Jovelyn Antalan ti Candon City Police Station, ti traysikel ket agturong iti abagatan a direksion idinto a ti Mitsubishi XForce ket agturong iti amianan a direksion.
Idi nadanonda ti nakapasamakan ti insidente, immagaw ti linya ti Mitsubishi XForce a rason ti panagdinnupar da iti traysikel.
Nadunor dagiti naglugan iti traysikel a dagus a naipan iti balay pagagasan para ti naan-anay a pannakatamingda idinto a saan a naan-ano dagiti nagkalugan iti Mitsubishi XForce.
Naammoan a ti drayber ti four wheels ket nakarikna ti pannaka-ulaw idi mapasamak ti insidente isu a saan na a nakontrol ti lugan.
