VIGAN CTY – Nagpalawag ti Police Regional Office-1 iti panang-relieve da iti amin kadagiti nakadestino a PNP personnel iti ili ti San Vicente a nakakigtotan ni Governor Ryan Singson a kasla na-by-pass ta saan a naipakada kenkuana iti napasamak a balasaan.
Ti nasao a panagpalawag ket napasamak idi kalman iti naisayangkat a 4th Quarter 2020 Joint Meeting ti Provincial Peace and Order Council-Provincial Disaster Risk Reduction and Management Council-Provincial Anti-Drug and Abuse Council-Provincial Development Council iti panangidaulo ti PPOC Chairman a ni Singson.
Segun ken ni Police Brig. Gen. Randolph Balonglong –Deputy Regional Director for Administration ti PRO-1, ti pannaka-relieve iti pwesto iti amin a miembro iti San Vicente Municipal Police Station ket paset iti maipapatungpal a retraining program ni PRO-1 Regional Director Police Brig. Gen. Rodolfo Azurin Jr. kasaruno iti mandato iti PNP.
Segun ken ni Balonglong, saan nga intensyon ti PRO-1 nga i-by-pass ti PPOC chairman ngem impatangkenna a ti nasao nga addang ket paset iti panangpasayaat ti PNP iti serbisyoda iti umili.
Maipalagip a nagdinamag a ti pannaka-relieve iti pwesto iti amin a personnel iti San Vicente MPS gapu iti mapapati nga unsolved cases iti opisinada a saan nga insigida a nasungbatan ti provincial government ta saan a naipakada iti opisina ti gobernador iti nasao a balasaan.
