Ibilang ti maysa a human rights advocate a napateg a gundaway para iti hustisia ti pagilian ti pannakakemmeg ken panangsango ni dati a Presidente Rodrigo Duterte ti kaso a ‘crimes against humanity’ iti International Criminal Court gapu iti war on drugs ti administrasyonna.
Iti pannaki-uman ti Bombo Radyo Vigan ken ni Carlos Conde, daytoy ti umuna nga addang para iti accountability ken ibilangna a kapintasan a damag iti benneg ti human rights kalpasan ti mano a dekada a naglabas.
Kunana a nabiag ti rikna ti pamilia dagiti biktima ti war on drugs ta saanda idin a ninamnama nga adda hustisia ditoy pagilian gapu ta kontrolado ni Duterte ti justice system ken dagiti kapulisan isu nga awan ti naganarda a hustisia.
Innayon ni Conde a napateg ita a masuportaran ti pamilia dagiti biktima ken denggen ti international community ti arungaingda, kasta payen nga ipasigurado ti ICC ti patas a trial para iti kaso.
Numan pay saanda nga ilusyon a dagus a madusa ti dati a presidente, nakasagana dagiti pamilia dagiti biktima ken namnamaenda a dumalan daytoy iti due process.
