Pormal nga inrusat ti Maritime Industry Authority (MARINA) ti Philippine Overseas Shipping Industry Assessment para iti panagpa-pigsa iti posision ti Pilipinas iti international stage.
Napasamak ti panangirusat iti Second Semester Meeting iti nagbaetan ti MARINA ken dagiti pribado nga stakeholder a naisayangkat virtually iti panangidaulo ni Overseas Shipping Service Director Ramon Hernandez.
Gagem ti assessment nga ammoen ti kasasaad ti overseas shipping, agdama a trend, kabaroan a panagdur-as, dagiti karit ken dagiti sumarsaruno nga addang.
Napateg ti nadakamat nga assessment tapno maammuan dagiti datos a makatulong iti panagngato wenno panangpalawa ti Philippine ship registry.
Binigbig met ni MARINA Deputy Administrator for Operations RAdm Loumer Bernabe ti aktibo a partisipasion dagiti pribado nga stakeholder iti baet ti madi a paniempo.
