Nangiruar iti updated guidelines ti Department of Health kontra iti nakaro nga epekto ti nabara a panawen iti salun-at.
Maibasar iti DOH Department Memorandum, gagemna daytoy a labanan ti epekto ti nakaro a kinabara nangruna ta manamnama a ngumato pay ti heat index kadagiti sumaruno nga aldaw.
Karaman iti addang nga imbilin ni Health Secretary Ted Herbosa kadagiti amin a DOH unit ti panangikabil iti cooling centers ken hydration station.
Dagiti cooling center ket air conditioned wenno naurnos ti pagserkan ti angin ken maikabil kadagiti ruta ti pampubliko a transportasyon a nadaras a papanan dagiti senior citizen, ubbing, masikog ken dagiti adda rangkapna.
Maipatakder pay dagiti hydration station kadagiti DOH facilities tapno adda access ti publiko iti nadalus a danum a mainom.
Impalagip met ni Sec. Herbosa ti publiko nga agisuot iti komportable a kawes ken liklikan ti agkainitan.
