Binanatan ni Kamanggagawa Partylist Representative Eli San Fernando ti panangipangruna ti gobierno iti panangited iti temporaryo nga ayuda kadagiti mangmangged imbes a mangipatungpal iti nasken a nayon iti sueldo.
Para ken ni San Fernando, ti kastuy a pagannurotan dagiti economic manager ket insult kadagiti nasurok 5 milion a minimum wage earner iti pagilian.
Dayta ket kalpasan ti panangibaga ni Department of Economy, Planning, and Development Director Desiree Joy Narvaez iti House Deca Tri Committee hearing a ti polisiya ti agdama nga administrasion ket nakapokus iti panangipaay iti subisidiya imbes a suportaran ti gakat a 200 pesos a nayon iti inaldaw a sueldo.
Impaganetget ni San Fernando a maysa a panangbastos kadagiti gagangay a mangmangged ti gakat a 1,500 pesos a subsidy nga umab-abot iti 50 pesos kada aldaw iti uneg ti maysa bulan.
