Panangideklarar ti public health emergency gapu iti immadu a kaso ti HIV, saan a kasapulan segun ken ni Rep. Garin

Pinasingkedan ni House Deputy Majority Leader ken Iloilo 1^st District Representative Janette Garin a saan a kasapulan nga agdeklarar ti public health emergency gapu iti ngumatngato a kaso ti human immunodeficiency virus wenno HIV iti pagilian.

Impaganetget ni Garin a dati a Health Secretary a pagbalinen nga available ken accessible iti amin nga agas iti HIV.

Inlawlawag ni Garin a ngimmato ti natamaan iti HIV gapu iti ad-adu a naidalan iti test nu ikumparar idi kallabes.

Singasingna a papigsaen ti HIV awareness tapno malapdan iti panagwaras ti baro nga infections, masalakniban iti tunggal maysa ken maikkat iti stigma wenno panangdillaw ken diskriminasyon kadagiti matamtamaan iti sakit.