VIGAN CITY – Manarimaan pay laeng iti imbestigasyon dagiti otoridad iti napasamak a panagtakawan iti pagtaengan da Guillermo Bolesa Rosario nga agtawen iti innem a pulo ket uppat, naasawaan ken agnaed idiay Barangay Tamag, Vigan City idi alas nuwebe singkuwenta y sais iti agsapa idi June 18.
Matmaturog idi ti biktima, kadua na ti live in partner na a ni Maricel Bethan Magallanes ken ti anak da a ni Zian Guiller Rosario iti uneg iti kuwarto da idi mapapati a simrek dagiti saan pay nabigbig a suspek iti uneg iti pagtaengan da babaen iti saan a nakaisarra nga arwangan ket intaray da iti nangisita a leather wallet ti biktima a naglaon ti sangapulo a dolyar, kwarta a pito ribo uppat a gasut a pisos ken dua a pouch a naglaon iti sangapulo ket pito ribo a pisos a koleksyon iti palwagan ken uppat a ribo walo gasut a pisos a naglakoan da iti sari-sari store a nakaikabil iti rabaw iti istante iti kwarto da.
Segun ken ni Police Chief Master Sergeant Chester Dandin, chief investigator ti Vigan City police station, addan dagiti persons of interest da iti nasao a panagtakawan ngem saan da pay a mabalin nga ibuksilan tapnu saan a maapektaran iti imbestigasyon da.
Dagiti maibilang a persons of interest iti maysa a pasamak ket isuda iti pagsaludsudan dagiti pulis tapnu masolbar iti maysa a krimen ngem saan da a suspek.
