VIGAN CITY – Manarimaan pay laeng iti imbestigasyon dagiti otoridad iti panagtakawan a napasamak idiay Poblacion, Sta. Catalina idi naminsan a rabii a nakatakawan iti lotion, bangbanglo, sigarilyo ken sinsilyo nga aggatad iti dua ribo innem a gasut a pisos.
Segun ken ni Police Senior Inspector Richard Cario, hepe ti Sta. Catalina municipal police station, posible nga adda met laeng iti asideg iti natakawan a pagtagilakwan ti suspek ken saan da met ilaksid iti posibilidad a mabalin a dagiti menor de edad nga adda pakasaritaan na iti panagtakawan iti nasao nga ili iti nangserrek iti nasao a pagtagilakwan.
Inaklon ni Cario nga uray nu inoras da nga agpatrolya kas bilin ni Police Senior Superintendent Adolfo Rafanan ti Ilocos Sur Police provincial Office, saan da latta a maranaan dagiti suspek iti naduma-duma a krimen ta posible a sisiimen da met iti garaw dagiti otoridad.
Ti round the clock patrolling ket inmandar ni Rafanan tapnu malapdan dagiti naduma-duma a krimen a mapasamak, nangruna dagiti panagtakawan.
