Maysa ti natay ken sangapulo ket pito nga indibidual ti nayospital gapu iti leptospirosis idiay Barangay Pilar, Sta. Cruz, Ilocos Sur.
Ti natay ket maysa a mangngalap manipud iti Bangar, La Union.
Iti pannaki-uman ti Bombo Radyo Vigan ken ni Barangay Captain Alexander Bermudez, dagiti nakaptan ket isu dagiti napan nagipon ta nangrugi ti ‘Ipon Season’ iti lugarda idi Setyembre 19 ken nagtultuloy ti panagturongda agingga idi kalkalpas ti bagyo.
Agpapada a nakarikna iti sintomas dagiti pasyente kas ti narigat a panagisbo ta dagitoy ket mapapati nga adu ti nainomda manipud iti kontaminado a danum ti karayan.
Manipud iti 17 a nayospital, pito kadakuada ti natalgeden ti kasasaadna kalpasan ti idadalanda iti screening idinto a dagiti sangapulo ket maob-obserbaran pay laeng iti ospital.
Nupay kasta, naiwaras met ti Doxycycline nga agas kadagiti agindeg a naapektaran idi kalman tapno maliklikan ti panagraira ti sakit.
Inlawlawag ni Kathy Antolin Alegre, kadua dagiti napan nagipon nga awan ti epektona daytoy kadagiti nagsida no di ket iti kontaminado a danum ti karayan a nainom dagiti bimmatok.
Segun kenkuana, natalged pay laeng ti kasasaad dagiti napan nagipon iti agingga tallo nga aldaw, ngem idi maikapat ken maikalima nga aldawen ket isun ti nangruggian a nakariknaan dagiti pasyente iti sintomas kas ti trangkaso.
