VIGAN CITY – Pinasingkedan ni dati a health secretary ken agdama nga Iloilo Rep. Cong. Janette Garin nga awan ti maitulongna ti panagpipinnabasul no mainaig iti panangparmek ti coronavirus ta mangdadael laeng iti nasayaat a healthcare system ti pagilian ken mangipasimudaag a saan a marisut iti parikut.
Ti pannaki-uman ti Bombo Radyo Vigan ken ni Garin, ti panagpipinnabasul ket mangpaawan ti ganas kadagiti opisial manipud ti maseknan nga ahensia kas ti Department of Health (DOH) nga agtignay tapno malabanan ti nasao a sakit.
Agtalek ni Garin a kabaelan ti DOH a risuten iti nasao a parikot ngem agduduwa da agsipud ta panpanunuten da iti reaksyon dagiti umili kadakuada kasta payen dagiti saan a pudno nga impormasyon nga agwarwaras a mangal-allilaw iti publiko.
Kabayatanna, patien ti kongresista a nalaklaka tatta a labanan ti coronavirus agsipud ta idi kallabes ket in-inut pay a naparmek ti kaso ti SARS, MERSCOV ken HIV babaen iti panagtitinnulong ti amin nga umili nangruna dagiti opisial ti gobierno.
