VIGAN CITY – Patien ti ACT Teachers Partylist a saan a naballigi ti panangipatungpal ti gobierno iti distance learning gapu kadagiti estudiante a napilitan nga agilako kadagiti sensitibo a ladawanda iti social media tapno makagatang iti gadget nga aramatenda nga agbasa.
Iti pannaki-uman ti Bombo Radyo Vigan ken ni Rep. France Castro, madanagan ti grupoda iti napasamak isu a kiddawenda iti gobierno a mangipaayda iti kasapulan dagiti estudiante.
Malaksid ti dayta, masapaul a tignayanen ti Department of Justice ken National Bureau of Investigation tapno matiliw dagiti manger-aramat kadagiti ubbing.
Inallukoy ti kongresista ti Department of Education ken Commission on Higher Education nga agridam ken agbalin a sensitibo iti panangtarabayda kadagiti estudiante ken napateg ti suporta dagiti nagannak.
