Dead on arrival ti maysa a drayber gapu iti panagdinnungpar ti motorsiklo ken van iti national highway ti Barangay Saoat, Sta. Cruz, Ilocos Sur.
Nabigbig ti nagmaneho iti Mio motorcycle a ni Kenneth Molina, agtawen iti duapulo ket uppat, taga-San Nicolas, Candon City.
Ti met nagmaneho iti HIACE van ket ni Chito Idtohan Igano, agtawen iti tallopulo ket walo, taga-Antipolo City, Rizal.
Agpapa-amianan ti motorsiklo idinto nga adda iti bangir a linya ti van ket idi nadanonda ti nakapasamakan ti insidente, nasagid ti motorsiklo ti maysa a lugan nga agpapa-abagatan isu a saanna a nakontrol ti manibela ti luganna ket nagdinnungparda iti makasinnabetna a van.
Gapu dayta, nagsagrap iti nakaro a dunor ti ulo ti drayber ti motorsiklo a naitaray iti ospital ngem saanen a nakalasat.
Saan met a naan-ano ti drayber ti van ken dagiti inluganna.
