Dead on arrival ti maysa nga Indian national iti panagdinnungpar ti trak ken motorsiklo iti national highway, Barangay Gongogong, San Ildefonso, Ilocos Sur.
Ti Isuzu Truck Dropside a minaneho ti agtawen iti limapulo ket maysa, taga-Barangay Pantay Fatima, Vigan City idinto a ti Yamaha NMAX ket minaneho ti maysa a taga-Balaleng, Bantay.
Iti pannaki-uman ti Bombo Radyo Vigan ken ni Police Captain Joseph Fieldad, agpapa-amianan ti trak ket idi madanon ti nakapasamakan ti aksidente, immagaw iti linya ti motorsiklo isu a nagdinnungparda.
Saan a napaspas ti pataray ti motorsiklo ngem mapapati nga adda inovertakean-na a kotse.
Nagsagaba iti dunor iti ulo ken nadumaduma a paset ti bagina ti drayber ti motorsiklo isu a naipaagas iti ospital ngem saanen a naispal ti biagna.
Saan met a naan-ano dagiti naglugan iti trak.
