Dead on arrival ti maysa a drayber iti napasamak nga aksidente iti national highway ti Barangay Saoat, Sta. Cruz, Ilocos Sur.
Nabigbig ti nagmaneho iti Isuzu Forward Truck a ni Rodelio Gilboy, agtawen iti tallopulo ket lima, taga-Barangay 74, Tacloban City, Leyte.
Ti met drayber ti Yamaha Mio1 ket ni Johnson Fajardo Ablab, agtawen iti duapulo ket tallo, taga-Barangay Las-ud, Sta. Cruz.
Kabayatanna, ti met drayber ti Hyundai Grace Passenger Van ket ni Marcelino Furagganan Torres, agtawen iti uppat a pulo ket lima, taga-Barangay San Juan, Pamplona, Cagayan.
Agpapa-abagatan ti trak ket idi nadanonna ti rangtay, nag-counterflow ti napaspas ti patarayna a motorsiklo ket nagdinnungparda.
Naipurwak ti motorsiklo ket nadungparna ti agpapa-abagatan a van nga adda iti likudan ti trak.
Nagsagaba iti fatal head injury ti drayber ti motorsiklo ket naitaray iti ospital para iti pannakatamingna ngem saanen a nakalasat.
Nupay kasta, saan met a naan-ano ti drayber ti trak ken van ngem naipanda latta iti ospital para iti medical examination.
