Nadunor ti nagmotorsiklo a lalaki gapu iti panagdinnungparda iti maysa a multicab iti intersection iti National Highway ken Heroes Bypass Road idiay Barangay Tablac, Candon City, Ilocos Sur idi alas otso kuarentay otso idi February 19, 2025.
Ti nagmaneho iti puraw a Jailing Well 125 motorcycle ket ni Ali Torres Bayas, agtawen iti tallopulo ket maysa, laborer nga agnaed idiay Barangay Caburao, Santiago idinto a ti nagmaneho iti silver Multicab Suzuki ket ni Cesar Bangsoy Sanguyen Jr., agtawen iti uppat a pulo ket innem, naasawaan, substation supervisor iti ISECO ken residente idiay Barangay Buliclic, Sta. Lucia.
Iti pannaki-uman ti Bombo Radyo Vigan ken ni PLt. Col. Rodel C. Del Castillo nga Officer-in-Charge iti Candon City Police Station, agpapabagatan a direksyon ti nakamotorsiklo idinto nga adda iti bangir a direksyon ti multicab idin kellaat a nagsardeng ti tengnga ti national highway ti multicab gapu iti limmabas a sabali pay a motorsiklo iti sangona bayat ti kaaddada iti intersection.
Segun ken ni Del Castillo, ti panag-abanten ti multicab ket isu metten ti iseserrek ti nakamotorsiklo a ni Bayas a gappuanan ti panagdinnungparda.
Gapu iti nakaru a dunor ken fracture iti ima ti nagmotorsiklo ket naipan iti Ilocos Sur Medical Center babaen kadagiti nagresponde a BFP personnel para iti pannakatamingna idinto a ti driver ti multicab ket naipan ti Candon City Hospital para ti medical examination.
