Inrugin ti Senate Committee on Games and Amusement ti panagdengngeg mainaig iti panagraira ken epekto ti online gambling kadagiti umili ken iti intero a pagilian.
Tallo a gakat, tallo a resolusyon ken maysa a privilege speech ni Senador Migz Zubiri mainaig iti panagraira, reulasyon, epekto, ken pannakaiparit ti online gambling iti pagilian ti natratar ita ti komite.
Iti damo ti panagdengngeg, impaganetget ni Senate Committee on Games and Amusement Chairman Erwin Tulfo nga i-shut down wenno i-ban ti operasyon ti online gambling iti pailian ken pagbalinen a krimen ti operasyonna gapu iti epektona iti biag dagiti umili ken ti kumarkaro a pannaka-adik dagiti agtutubo.
Singasing ti senador a mai-block ti plataporma ken server ti online gambling ken dusaen saan laeng a dagiti operator no di ket uray dagiti enabler, iti isu met laeng a gobierno ken pribado a sektor.
Impaganetget met ni Senate Majority Leader ken Joel Villanueva a saan laeng a pukaw iti pondo ti agbalin nga epekto ti online gambling no di ket mangitunda pay iti serious physical ken mental health issues, pannakarakrak ti pamilia ken relasyon, panagadu ti kaso ti domestic violence, suicide, crime against person and property, ken kinaawan ti oportunidad ken dignidad para kadagiti Pilipino.
