Kiniddaw ni Pres. Ferdinand Marcos Jr. ken ni Senate Pres. Vicente “Tito” Sotto III nga insigida a pagbalinen a linteg ti panagamyendar ti Biofuels Act of 2006.
Sinertipikaran dayta nga urgent ni Pres. Marcos kas maibasar iti surat a naipatulod iti Senate President ita nga aldaw.
Segun ken ni Marcos, gagem ti sertipikasyonna a palag-anen ti epekto ti ngimmato a presyo ti langis gapu iti agtultuloy a tensyon idiay Middle East.
Gagem pay iti panag-amyendar ti linteg a mapapigsa iti kinatibker iti pagilian kontra kadagiti sangsangwen a pannubok iti energy supply.
Babaen ti Biofuels Act ket maibilin ti mandatory blending wenno panangilaok ti biofuels iti gasolina ken diesel fuels tapno makissayan ti panagbalin a dependent iti Pilipinas iti imported a langis, mapasayaat ti kalidad iti angina ken mapapigsa iti ekonomia.
