VIGAN CITY – Ur-urayen pay laeng ti Department of Social Welfare and Development Region 1 ti pammilin ti Central Office para iti pannakaiwaras ti maikadua a paset ti Social Amelioration Program.
Segun kenni Regional Information Officer Darwin Chan, 97.78% kadagiti kwalipikado a benepisyaryo ti naikkanen iti nasao a tulong pinansial ken nangitudingdan ti pawayway para kadagiti probinsia a saan pay a nakakompleto.
Dagiti pondo a saan a naaramat para iti umuna a pannakaiwaras ti tulong pinansial pakairamanan dagiti nagisubli iti naawatda ket maited iti National Treasury Office ta isu ti aramaten ti gobierno kadagiti nadumaduma a programada.
Pinasingkedan ni Chan nga adu dagiti nagisubli iti naawatda a tulong pinansial babaen iti SAP ta dagiti dadduma a pamilia ket nakaawaten manipud iti Department of Labor and Employment ken Department of Agriculture.
Malaksid iti dayta, nasurok limapulo a ribo pay ti kwalipikado a benepisyaryo ngem saan a nairaman iti target a maikkan isu a tatta a gundaway ket impasigurado ti opisial a makaawatdan iti 2nd tranche ti nasao a programa.
