VIGAN CITY – Addan dagiti person of interest ti Narvacan municipal police station inaig iti napasamak a pammaltog idi alas otso y media iti agsapa idi June 16 idiay Barangay San Pablo, Narvacan a nakatayan ti biktima a ni Rodolfo Cabaña Bitle Sr., nga agtawen iti innem a pulo ket uppat, awanan iti pagsapulan, tubo idiay Banglayan, Narvacan ngem aggigiyan idiay Santa.
Segun ken ni Police Major Rogelio Miedes, hepe ti Narvacan PNP, naggapu idiay Banglayan, Narvacan ti biktima ket agawid kuman idiay Santa a nakalugan ti kurong-kurong na idi sinurot dagiti suspek a nakalugan iti motorsiklo sa da pinaltugan iti mamin-lima a daras.
Tama iti bukot, tengngegd ken saka iti sinagaba ti biktima a poon iti nakatayan na ket caliber 45 iti mapapati nga inusar dagiti suspek kas maibasar kadagiti kapsula iti paltog a naala iti nakapasamakan iti pammaltog.
Ti nasao a pasamak ket naiyalarma nga insigida idi kalman kadagiti kabangibang a police station ti Narvacan para iti hot pursuit operation ngem nagnegatibo ti resulta.
Kabayatanna, adda iti pasdek iti lugar a mapan to kitaen dagiti otoridad a posible nga adda CCTV na a nakaala iti pasamak a mabalin a makatulong iti imbestigasyon.
