Saanen nga agipila iti kaso ti pamilia ti drayber a natay iti panagdinnungpar ti dyip ken motorsiklo iti national road ti Poblacion, Suyo, Ilocos Sur.
Ti natay a drayber ti motorsiklo ket ni Joker Lamarca Jornacion, agtawen iti tallopulo, taga-Kinmarin, Salcedo, kinalubonna ni June Salay Capulas, agtawen iti uppat a pulo ket dua, taga-Barangay Pidpid, Sta. Cruz.
Ti met drayber ti dyip ket ni Fernando Bagsang Daoa, agtawen iti uppat a pulo ket innem, taga-Barangay Suyo Proper, Suyo.
Iti pannaki-uman ti Bombo Radyo Vigan ken ni Police Captain Godofredo Ribuyaco iti Suyo Municipal Police Station, iti insiyal a nagpatangan, tumulong laengen ti drayber ti dyip kadagiti magastos iti pannakaimasayag ti biktima.
Innayon pay ni Ribuyaco a posible a napuyatan ti biktima ta naggapuda iti natayan isu a naagawna ti linya ti dyip idi madanonna ti agsikko a paset ti kalsada a puon ti napasamak nga head on collision, numan pay nagpreno met ti dyip.
Naitaray ti drayber ti motorsiklo iti Ilocos Sur District Hospital Tagudin ngem naideklarar a dead on arrival idinto a ti backride met ket nadunor ti nadumaduma a paset ti bagina.
Saan met a naan-ano ti drayber ti dyip ngem naipaagas latta iti Suyo Rural Health Unit para iti medical examination.
